Danılovıç otitten soñ sol qulağında eşitüv qabiliyetini coydı. Bundan da ğayrı, QRM haber etkenine köre, o, mikroinsultten soñ bedeniniñ sol tarafı yaramay olğanından şikâyet ete.
Qoranta ve göñüllilerden ilâclarnıñ berilmesi, QRM-niñ aytqanı kibi, tek bir ilâc ile sıñırlana. Tibbiy yardımnı elde etmek de qıyınlaşa: bütün kerekli ilâclarnı elde etmek içün, Danılovıç Rusiye ekimleriniñ retseptlerine muhtac, olarnı tek teşkerüvge ketirilgen soñ almaq mümkün.
"Qadınnı avtozak izolâtorlarında (stakanlarda) koloniyalardan 300 km uzaqlıqta yerleşken Minvodıdaki ekimlerge alıp keteler, bu ise vaziyetni daa ziyade yaramaylaştıra", — dep haber ete Merkez.
Hatırlatamız, 2022 senesi qırımlı jurnalist ve aq qorçalayıcı İrına Danılovıçnı FSB hadimleri qaçırdılar. Daa soñra onı patlayıcı maddeler saqlağanında qabaatladılar, tahqiqat izolâtorında ise otit hastalığı sebebinden uzun müddet tibbiy yardım kösterilmedi. Neticede faalniñ bir qulağı eşitmey ve tedaviylenmey.
Keçken sene avgust ayında, koloniyada bulunğan soñ, Danılovıç qulaq ve baş ağrıları sebebinden tibbiy bölükke muracaat etti, amma ekim Lidiya Morozova, Danılovıç sağırlaşqan soñ, ağrı özü keçecek, dep ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
