Onıñ aytqanına köre, bu onıñ etapınıñ soñ noqtası degil. Tezden onı tüzetüv cezahanesine alıp ketecekler.
"Bütün bu vaqıt devamında, apishaneden çıqqanımda, meni bir yerden başqa bir yerge alıp kettiler. Böyle etip, mektüp yazıp olamay edim, çünki anda [tranzit noqtalarında] bu çalışmay. Em de aşayt malları meselesi bar edi — men bir şey satın alıp olamadım, çünki men tranzitçi edim", — dep yazdı Aziz Ahtemov.
Qırımtatar qayd etti ki, soy-sopları yollağan qomşusınıñ paketinden biraz aş alıp ketmege planlaştırğan, lâkin yetiştirmegen — Azizni "apansızdan" etap etkenler.
"Yolğa çıqmazdan evel men müdirliknen laf ettim, ve olar maña biraz qalıp, erzaq alacağımnı añlattılar, amma soñunda men boş kettim. 10 dane doşırak ve biraz qave bar edi. Bu qadar. Ve bunıñ episi bir afta içinde bitti. Qaç kilo olğanımnı bilmeyim, amma sentâbr 16-da 77 kilo edim. Amma o vaqıt aş endi az edi, saba ve aqşam aşay edim", — dep bildirdi siyasiy mabüs.
Onıñ aytqanına köre, etap devamında onı bir kere bile kezintige çıqarmağanlar, ve kamerada oturmağa mecbur olğan. Amma Novosibirsk izolâtorında yürüv cedveline riayet eteler — o, er kün tışarığa çıqa.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Oktâbrniñ 2-nde ağa-qardaş Ahtemovlar Aqmescitteki SİZO-2-den alındı ve Rusiye apishanelerine etap etildi.
2023 senesi noyabr ayında Aziz Ahtemov Qırımdan Krasnoyarsk ülkesiniñ Yeniseysk şeerindeki apishanege 40 kün devamında etap etildi, cep haber etilgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
