Rusiye tarafından mahküm etilgen qırımlı Server Mustafayev insan aqları ve demokratiya saasında issesi içün Freedom House halqara aq qorçalayıcı teşkilâtınıñ mukâfatınıñ laureatı oldı.
Mustafayev içün mukâfatnı Ukrayinanıñ ABD-deki elçisi Oksana Markarova aldı.
"Menim içün onıñ adından bu mukâfatnı almaq ve Server ve Rusiye tarafından qanunsız tutulğan diger ukrayinlerni hatırlatmaq büyük şeref edi... Bu tanuv, Ukrayina ve qırımtatar halqınıñ Rusiye Federatsiyasınıñ sert repressiyalarına qarşı küreşi aqqında hatırlatmadır", — dep yazdı o.
Freedom House — 1941 senesi natsist Almaniyasına qarşı küreş içün siyasetçiler ve faallerni birleştirmek maqsadınen qurulğan halqara uquq qoruyıcı teşkilâtıdır. Bugün teşkilât bütün dünyada serbestlik ve demokratiyanı qorçalamaq ve ileriletmeknen oğraşa. Freedom House insan aqları oğrunda küreşken faallerge ve aq qorçalayıcılarğa qol tuta, em de er yıl bu degerliklerniñ inkişafına emiyetli isse qoşqan şahıs ve gruppalarğa mukâfatlar bere.
Server Mustafayev "Qırım birdemligi" cemaat birleşmesiniñ koordinatorı. 2018 senesi tintüvlerden soñ quvetçiler Server Mustafayev ve Edem Smailovnı yaqaladılar.
2020 senesi ilk küz ayınıñ 16-nda Rostov-na-Donu Cenübiy okrugınıñ arbiy mahkemesinde qırımtatar aq qoruyıcısı 14 yılğa azatlıqtan marum etildi. Olarğa qarşı qabaatlavlarnı Bağçasaraydaki Hizb-ut-Tahrir Davasına qoştılar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
