"Hizb ut-Tahrir davası"nıñ Canköy gruppasınıñ ekinci figurantı Halil Mambetovnı Taganrognıñ 2-nci SİZO-sına etap ettiler. Bu aqta "Qırım birdemligi" onıñ tuvğanlarına atıf etip bildire.
"Olarnıñ aytqanına köre, 70 yaşındaki qırımtatarnı arman ayınıñ 21-nde ketirgenler. O, sekiz kişilik kamerada buluna, yüksek qan basımından şikâyet ete ve "Kardiomagnill" ilâcına muhtac. SİZO-da erkek oña basqı yapılmağanını, fizikiy küç qullanılmağanını qayd ete, amma şimdilik onıñ telefon etme ve qorantasınen uzun müddet körüşme aqqı yoq", — dep aytıla haberde.
2023 senesi qara qış ayınıñ 24-nde saba Canköy rayonında Rusiye quvetçileri qırımtatarlarnıñ evlerinde tintüvler keçirdi: Ekrem Kroşnıñ, Ayder Asanov ve Refat Seydametov, Osman Abdurazakov, Leman Zekiriyev ve Halil Mambetovnıñ evlerinde.
Cenübiy okrugınıñ arbiy mahkemesi Mambetovnı 14 yılğa azatlıqtan marum etti — ilk dört yılını apiste, qalğanını — sert rejimli koloniyada keçirmeli.