Rusiyede mahkeme Rusiye akimiyeti tarafından "casuslıqta" qabaatlanğan qırımtatar Leniya Umerovanıñ apis müddetini eki ayğa uzattırdı. Bu aqta onıñ advokatı Olğa Dinze "Suspilne Qırım"ğa bergen izaatında bildirdi.
''Apis müddetini 04.05.2024 senesine qadar uzattılar, yani 2 ayğa qadar'', – dep bildiridi o.
Advokatnıñ aytqanına köre, davanıñ tahqiqatı devam ete.
Daa evel haber etilgenine köre, Rusiye mahkemesi Ukrayina vatandaşı Leniya Umerovanıñ apis müddetini uzatmaq qararına imayeniñ şikâyetini red etken edi. O vaqıt oña 2024 senesi martnıñ 4-ne qadar apis müddetini uzatqan ediler.
Olğa Dinzeniñ aytqanına köre, Umerova ağır alda, Qırımda rak hastalığı olğan babası içün qasevetlene.
''Onıñ içün pek ağır. Beklemekten bezdi. Bundan da ğayrı, babası hasta, onıñ içün pek qasevetlene", - dedi Dinze.
2022 senesi dekabr ayında 25 yaşındaki Leniya Umerova Kıyivden Qırımğa ketmek kerek edi, çünki babası onkologiya hastası. Rusiye quvetçileri onı, rejim zonasınıñ qaidelerini bozğanı içün, Gürcistan-Rusiye sıñırından keçken soñ tuttı.
Üç aydan soñ onı yiberdiler, lâkin Leniyeni vesiqaları olmağanı içün, polis patruli tuttı, dep tarif etti qıznıñ ağası. Neticede Rusiye mahkemesi oña 15 künlik apis cezasını berdi. Bundan soñ qızğa qarşı daa eki protokol tizildi.
2023 senesi mayısnıñ 5-nde Moskvanıñ Lefortovo mahkemesi Umerovanı casuslıqta qabaatlap apiske aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
