Rusiyede Moskvanıñ Basman mahkemesi RF Devlet dumasınıñ sabıq deputatı ve muhalifetçi Mark Feyginni ğıyabiy şekilde 11 yılğa apiske aldı. O, "Rusiye ordusı aqqında yañlış malümat" tarqatqanında qabaatlı tanıldı, dep bildire RİA "Novosti" agentligi.
Bu madde Rusiye Federatsiyasınıñ Ceza kodeksine 2022 senesi Ukrayinağa yapılğan basqıdan soñ kirsetildi, Rusiye Federatsiyası ordusınıñ arbiy cinayetleri aqqında haber etken muhalifetçiler, blogerler ve arbiy areketlerge qarşı faaller bu maddege istinaden taqip etile. Feygin, Buçadaki vatandaşlarnıñ öldürilüvini muzakere etkeni ve öz YouTube kanalında yayınlağanı içün mahküm etildi.
53 yaşındaki Feygin Rusiye mahkemelerinde ukrayin faalleri ve Rusiye muhalifetiniñ vekillerini qorçalağan sabıq advokat. O, Ukrayinada yaşay. İşğal başlağanından berli o, cenkni öz YouTube kanalında aydınlata, oña tahminen eki million insan qol tuta.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
