Rusiyeniñ Yuqarı mahkemesi qırımlı Asan ve Aziz Ahtemovlarnıñ ükmüne qarşı berilgen temyiz talabını red etti, dep haber ete "Qırım esnası".
Qayd etilgenine köre, Ahtemovlar mahkeme oturışında video bağı vastasınen iştirak etkenler. Oturışta qorçalav tarafı da iştirak etken: advokatlar Refat Yunus, Safiye Şabanova, Emine Avamilâva, em de cemaat imayecileri Repika ve Adile Ahtemovlar.
Oturış açıq şekilde olıp keçti, amma esnasqa tek 10 diñleyici yiberildi.
2022 senesi sentâbrniñ 21-nde Rusiye kontrolindeki Qırım Yuqarı mahkemesi Anğara köyünde gaz borusında diversiya davası boyunca üküm çıqardı. Asan Ahtemov 15 yıl sert rejimli koloniyada qalmasına üküm etildi, 500 biñ ruble para cezasını aldı ve 1 yıl azatlıqtan marum etildi. Aziz Ahtemov 13 yıl sert rejimli koloniyada qalmasına üküm etildi, 500 biñ ruble para cezası ve 1 yıl azatlıq sıñırlaması berildi.
Oktâbrniñ 2-nde Nariman Celâl ve ağa-qardaşlar Aziz ve Asan Ahtemovlarnı Aqmescitteki 2-nci SİZO-dan çıqarıp, Rusiye apishanelerine etap ettiler.
2023 senesi noyabr ayında Aziz Ahtemov Qırımdan Rusiye Federatsiyasınıñ Krasnoyarsk vilâyetindeki 2-nci Yeniseysk apishanesine 40 künge qadar etap etilgenini bildirgen ediler.
2023 senesi sentâbrniñ 17-nde Aziz Ahtemovnıñ ömür arqadaşı, onı Rusiyeniñ Krasnoyarsk vilâyetindeki Yeniseysk şeerindeki apishaneden belli olmağan yönelişte etap etkenlerini bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
