Rusiyede büyük apis cezalarına üküm etilgen Yaltadaki «Hizb ut-Tahrir davasınıñ» mabüsleri olğan üç qırımlı Rusiyeniñ Novoçerkassk şeerindeki tahqiqat izolâtorınıñ mahsus blokuna qapatıldı.
Bu aqta mabüslerden biri Vadim Siruknıñ ömür arqadaşı Anna Bogaçeva «Qırım birdemligi» cemaat birleşmesine haber etti.
Qadın, yanvarniñ 9-nda aqayından kelgen mektüpte qırımlılarnıñ mahsus blokqa avuştırılğanını ögrendi.
«Meni, Emir-Useinni, Muslim ağanı Novoçerkassknıñ SİZO-3-ne avuştırğanlar. Qalğanlarını bilmeyim. Mahsus bloknıñ bir kişilik kameralarında yatamız. Uzaq ve sessiz bir yer», – dep ayta mektüpte yazılğanlarnı Bogaçeva.
Onıñ aytqanına köre, tutuv rejimini sertleştirüv sebepleri belli degil.
«Advokatlarnıñ fikirince, izolâtor memuriyetleriniñ böyle areketleri qırımlı siyasiy mabüsler tutulğan çeşit SİZOlarda tendentsioz şeklini ala ve madde boyunca keçkenlerniñ menfiy hasiyetnamesini şekillendirmege yardım ete», – dep aytıla birleşmeniñ haberinde.
Bu malümat diger menbalarda tasdıqlanmay. SİZO reberliginiñ de izaatları yoq.
Rostov-na-Donu şeeri Cenübiy okrugınıñ arbiy mahkemesi noyabrniñ 12-nde Yaltadaki «Hizb ut-Tahrir davasınıñ» altı mabüsini koloniyada qalmasına üküm etti. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
Rusiyeniñ Amnesty International reisi Aleksandr Artemyev işbu ükümni «siyasiy taqip» dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
