Rusiyede mahküm etilgen qırımlı anarhist Aleksandr Kolçenko Çelâbinsk vilâyetindeki Köpeysk koloniyasınıñ ceza izolâtorına qapatıldı.
Bu aqta Rusiye aq qorçalayıcısı Tatyana Şçur «Ukrinform» agentligine haber etti.
«Saşa Kolçenko mayısnıñ 9-nda adet üzre ceza izolâtorında buluna, taqvimniñ er «qırmızı künü» olğanı kibi. Mayısnıñ 10-nda onı çıqarmağa isteyler, ğaliba. Advokatımız oña mayısnıñ 13-nde baracaq, o vaqıt bilecekmiz», – dedi Şçur.
Onıñ aytqanına köre, bayram künleri sebebinden rejim quvetleştirile ve «ağır» maddeleri olğan bütün mabüsler profilaktika maqsadınen alına.
Mart ayında Ukraina konsulına Kolçenkonen körüşmege kene imkân berilmedi. Aleksandr Rusiye vatandaşı ola, dep bildirgenler.
Oleg Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.
