Rusiyede bir künde 12126 insan koronavirusnen hastalandı. İşğali altındaki Qırım da sayıla. Pandemiya başlağanından bu raqam eñ yüksek oldı. Bu aqta COVID-19 ile küreş operativ ştabı bildire.
Bundan evel eñ yüksek raqam mayısnıñ 11-nde qayd etilgen edi. 11656 insan koronavirusnen hastalanğan edi. Pandemiya başlağanından berli Rusiyede aman-aman 1,3 mln kişi COVID-19-ğa oğradı, dep bildire Azatlıq Radiosı.
Rospotrebnadzor, ilk sefer bir künde Rusiyede yarım milliondan çoq test yapıldı, dep bildire. 250 biñ hasta tibbiy közetüv altında qala.
Bugün dünyada da COVID-19 hastalarınıñ sayısında rekord qayd etildi – aman-aman 350 biñ insan (Johns Hopkins Universitetiniñ malümatı)
Pandemiya başlağanından dünyada 36 milliondan çoq insan koronavirusqa oğradı. Milliondan çoq kişi vefat etti.
Tasdıqlanğan COVID-19 hastalarınıñ sayısına köre ABD, İndistan, Brazil ve Rusiye lider ola.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
