Rusiyede iyünniñ 7-nde 8985 koronavirus hastası qayd etildi – bir kün evelsi hasta sayısı bir insan az edi.
Bir künde 112 insan vefat etti, bu raqam keçken künlerge köre daa az oldı. 4 biñge yaqın insan tüzeldi, dep haber ete Azatlıq Radiosı.
Rusiyede koronavirus yuqunçından vefat etkeni resmiy şekilde qabul etilgen 6 biñ insan qayd etildi. Rusiyede koronavirusı qayd etilgen bütün hastalar COVID-19-dan vefat statistikasına kirsetilmey.
Qırğınlıq vaqtında Rusiyede 476 biñ hasta qayd etildi. 240 biñ kişi tedaviylenmege devam ete, 230 biñ insan tüzeldi.
Soñki eki aftada yañı hasta sayısı künde 8-9 biñ civarında qala.
Ukrainada iyünniñ 7-nde 463 yañı koronavirus hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
