Rusiyede Moskova ve Sankt-Peterburgdan Keriç köpründen ilhaq etilgen Qırımğa ve artqa ketecek birinci poyezdlerge 12 binden çoq bilet satıldı.
Buni noyabr 11-inde TASS rusiyeli haber agentligine "Qırim demiryolları" şirketiniñ reberligi haber etti.
Amma Qırımda Keriç köpründen keçken poyezdge bayağı azca bilet alındı.
"Umumem Rusiyede 12 027 ilet satıldı, Qırımda ise 2 344", - haber ettiler şirkette.
«Grand Servis Ekspress» naqliyat şirketi noyabrniñ 8-nde saba Keriç köprüden ketecek Qırımnıñ yolcu trenlerine bilet satmağa başladı.
Sentâbrniñ 24-nde Rusiye kütleviy haber vastaları dizelli lokomotiv test şeklinde Keriç köprüniñ demiryol qısmını keçti, dep bildirdi. «Stroygazmontaj» şirketiniñ müdiri, Rusiye iş adamı Arkadiy Rotenbergniñ bildirgenine köre, köpürniñ demiryol qısmında areket 2019 senesi dekabr ayında başlatılacaq.
Daa evel Rusiye akimiyeti Keriç köprüne 166 «yañı vagonnı» bermege vade etken edi. «Qırım demiryolları» müdiri Aleksey Gladilin Keriç köprüniñ demiryol qısmı açılğan soñ andan qomşu Rusiyeniñ 11 şeerinden trenler keçecek, dep ilân etti.
2019 senesi mayıs ayında Rusiye prezidenti Vladimir Putin Keriç köprüniñ demiryolu «cedvelden daa tez qurarlar», dep bildirdi.
Keriç köprüden keçecek yük trenleriniñ areketini 2020 senesi iyün ayında başlatmağa planlaştıralar.
