Rusiyede narazılıq aktsiyalarında iştirak etmege azır olğan vatandaşlarnıñ sayısı arttı. Bu aqta Rusiyeniñ «Levada-tsentr» soravında aytıla.
Sotsiologlarnıñ malümatına köre, yaşayış seviyesiniñ tüşmesine qarşı ve aqlarını qorçalav aktsiyalarına 27% (fevral ayında 26% edi) kelecek edi, siyasiy talaplar olğan narazılıq aktsiyalarına 22% (fevral ayında 20% edi) qoşulacaq edi.
Sotsiologlar cevap bergenlerden soñki narazılıq aktsiyalarından haberi barmı, dep soradı. Çoqusı (42%) Yekaterinburgda kilse qurucılığına qarşı aktsiyalar aqqında «bir şeyler eşitken edi», aman-aman aynı sayı – 41% – olar aqqında bilmey.
Soravda aytılğanına köre, Arhangelskte (çöplük poligonınıñ qurucılığına qarşı) ve İnguşetiyada (Çeçenistan ile sıñırnıñ deñiştirilüvine qarşı) aktsiyalar aqqında cevap bergenlerniñ ekseriyeti (65% ve 74%) ilk sefer eşitken edi. Vatandaşlarnıñ 17%, 8% ve 6%-ı olıp keçkenlerni diqqatnen taqip etken edi.
