Rusiye ükümeti, işkence ve insaniyetsiz ya da itibarını aşalağan munasebet ya da cezalarnıñ ögüni aluv Avropa şartnamesini lâğu etmekni teklif etti. Devlet Dumasına teklifni bermek içün prezidentke berilmesi aqqında qararnı baş nazir Mihail Mişustin imzaladı.
Vesiqada Rusiye şartname ve onıñ protokollarından çıqacağı aqqında aytıla.
2022 senesi saban ayında Rusiye Ukrainağa keñ kölemli basuvı sebebinden Avropa Şurasından çıqarıldı. Aynı senesi ilk küz ayınıñ 16-sından başlap Rusiye insan aqları Avropa şartnamesiniñ tarafı olmaqtan vazgeçti ve İnsan aqları Avropa mahkemesiniñ yurisdiktsiyasından çıqtı.
2024 senesi boş aya Avropa işkencelerge qarşı komitetinde işkence ve insaniyetsiz ya da itibarını aşalağan munasebet ya da cezanıñ ögüni aluv Avropa şartnamesi açıq şartname olğanını bildirdiler, bunıñ içün Rusiye 2022 senesi Avropa Şurasından çıqarılğan soñ bile onıñ maddelerine riayet etmege devam ete.
Avropa mahkemesi Rusiye akimiyetinden belli vaqialar, şu cümleden Aleksey Navalnıynıñ ölümi aqqında malümat istedi, amma cevap alamadı. Qayd etilgenine köre, Rusiye tarafından komitetniñ Rusiyege monitoring ziyaretlerini yapması içün iç bir areket yapılmadı.