Rusiye kontrolindeki Qırım prokuraturası Rostov-na-Donu şeerindeki Cenübiy okrugınıñ arbiy mahkemesine "terrorizmni aqlağanında" ve "milliy sebeplerden zorbalıqqa çağırğanında" qabaatlanğan erkekke qarşı cinaiy davanı yolladı.
Rusiye tahqiqatınıñ versiyasına köre, 2024 senesi küzde Aqmescit sakini içtimaiy ağlardan birinde "Rusiye territoriyasında teraktlar yapılğanını aqlağan" izaatlarnı qaldırğan.
Bundan ğayrı, 2026 senesi İlk yazda erkek, milliy mensüpligine köre, insanlarğa qarşı zorbalıq areketlerine çağıruvlarnı derc etkeni iddia etile.
Qabaatlanğannıñ adı ve izaatları aydınlatılmay. Rusiye tarafınıñ iddialarını mustaqil tasdıqlağan bir şey yoq.
Bundan evel aq qorçalayıcılar, 2026 senesiniñ başından işğal etilgen Qırımda "devletke qarşılıq", "terrorizm" ve patlayıcı maddelernen qullanuv davaları boyunca eñ azdan 28 üküm qayd etildi, dep bildirgen edi.