Rusiyede (işğal etilgen Qırımnen beraber) keçken künü 20 582 yañı koronavirus hastası qayd etildi. Pandemiya vaqtında bu eñ büyük raqam oldı, dep haber ete Azatlıq Radiosı.
Koronavirus tarqaluvı ile küreş operativ ştabınıñ malümatına köre, hasta sayısı 1,2%-ğa arttı.
COVID-19 diagnozı qoyulğan ve endi tüzelgen rusiyelilerniñ sayısı bir künde aman-aman 17 biñge arttı, bu pandemiya başlağanından eñ büyük raqam oldı.
Soñki künde COVID-19 diagnozı olğan 378 hasta vefat etti. Rusiyede vefat etkenlerniñ umumiy sayısı 30 biñge (29 887) yaqınlaşa.
Faqat, Rosstat esaplarına köre, aprel-avgust aylarında Rusiyede 45 biñden çoq hasta vefat etti, aman-aman 27 biñniñ esas ölüm sebebi COVID-19 oldı. Müessise operativ ştab malümatı ile olğan farqnı añlatıp, bazılarınıñ koronavirus yuqunçı ölümden soñ belli oldı ve COVID-19 sebebinden diger hastalıqları ağırlaşqanlar oldı, dep bildirdi.
Eñ çoq yañı hasta Moskvada – bir künde 6253, Sankt-Peterburgda – 1171 oldı. Epidemiya başlağanından berli eñ büyük raqam oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
