Rusiye prezidenti yanında insan aqları vekâletlisi Tatyana Moskalkova «Hizb ut-Tahrirniñ» «terrorist teşkilât» olaraq tanılmasınıñ doğru olıp olmağanını tedqiq etmege niyetlene.
«Kommersant» Rusiye gazetasınıñ bildirgenine köre, meseleni ombudsmen yanında mahsus qurulğan işçi gruppa ögrenecek.
«Rusiye Yuqarı mahkemesiniñ 14.03.2003 çıqarğan qararı «Hizb ut-Tahrirniñ" terrorist teşkilât olaraq tanılmasınıñ doğru olıp olmağanı ceetinden tedqiq etilecek. Neticede işçi gruppa baqacaq teklifler azırlanacaq», – dep yaza neşir.
İşçi gruppanı qurmaq qararı Moskalkovanıñ fevralniñ 5-nde «Hizb ut-Tahrir» ile alâqası olğanından şübheli sayılğan ve qabaatlanğan tuvğanları ile körüşüvinden soñ alındı.
«Memorial» aq qorçalayıcı merkeziniñ malümatına köre, Rusiyede ve işğal etilgen Qırımda «Hizb ut-Tahrirde» iştirak etkeni içün 239 insan apiske alındı, olardan 171-i mahküm etildi. 2013 senesine qadar olar Rusiye Ceza kodeksiniñ «ekstremist» maddelerine istinaden qabaatlanğan edi, ükümlerniñ 40%-ı ise azatlıqtan marum etüvnen bağlı degil edi. Amma 2013 senesinden başlap Rusiye Ceza kodeksinde 205.5 «terrorist» maddesi peyda oldı, bundan soñ mahkemeler daa da sert ükümler çıqarmağa başladı: 40 mahküm 15 yıldan 24 yılğa qadar apis cezasını aldı, daa 35-i – 10 yıldan 15 yılğa qadar. «Memorial» davanıñ 98 mabüsini «siyasiy mabüs» dep tanıdı, qalğanlarınıñ davaları daa ögrenilecek.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
