Bağçasaraydaki ekinci «Hizb ut-Tahrir davasınıñ» mabüsi, «Qırım birdemliginiñ» koordinatorı Server Mustafayevni bir oturışuvğa mahkeme salonından çıqardılar, dep bildire Qırım.Aqiqat mühbiri.
Mahkeme, Mustafayev «mahkemege sayğısızlıq köstergeni içün» çıqarıldı, dep bildirdi.
«Bugün Server Mustafayev onıñ suallerine «hatırlamayım» ya da «bilmeyim» dep cevap bergen şaat Artıkbayevniñ (Rusiye FSBsiniñ hadimi – QA) sorğusına devam etti. Yani Artıkbayev onıñ suallerine cevap bermedi. Tek eki cevabı bar edi. Serverniñ suallerini qadı Zubairov er vaqıt toqtata edi», – dep ayttı advokat Azamatov.
Onıñ aytqanına köre, Mustafayev açuvlanğanını qadığa da bildirdi: «Bu şaatnıñ miyini sizge bergenler sanki».
Neticede mahkeme aqıl tanışıp, Server Mustafayevni bir mahkeme oturışuvından çıqarmağa qarar aldı. Yani kelecek mahkemede iştirak etmeycek. Mustafayev şaatnıñ sorğusını bitirmedi, daa 60-qa yaqın suali bar. Olardan tek 15-ini berdi.
Noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqmağa başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
