Orta küzniñ 15-ne keçer gecesi Rusiyeniñ Voronej vilâyetiniñ Borisoglebsk şeerindeki arbiy uçaq alanına ücüm etildi. Bu aqta Ukrayin Telegram monitoring kanalları Supernova+ ve Exilenova+ haber ettiler.
Olarnıñ malümatlarına köre, ücümler "Tomahavk" raketalarnen yapılğan.
Voronej vilâyetiniñ valisi Aleksandr Gusev ücümniñ regionğa tesiri aqqında daa haber etmedi. Yarı geceden soñ o, dronlarnıñ havfı aqqında bir qaç bildirüv yaptı.
Eksilenova+ yerli sakinlerge atıf eterek, Râzanda yanğın çıqtı, belki de, neft işleme zavodında, dep bildire. Bu resmiy olaraq tasdıqlanmadı.
Rusiyeniñ Râzan vilâyetiniñ başı Pavel Malkov regionğa dronlarnıñ büyük ücümi yapılğanı aqqında haber etti. "Havfsızlıq masqadınen" Râzannıñ Oktâbrskiy ve Sovet rayonlarınıñ bir qısmındaki mekteplerde ve bala bağçalarında dersler lâğu etildi.
Ukrayina askerleri bu malümatnı izaatlamadılar.
Evel Ukrayina prezidenti Volodımır Zelenskıy "Finansial Tayms" gazetine bergen intervyüsında, Ukrayina yasaqnı lâğu etecek ve Rusiyeniñ neft işleme zavodlarına qarşı ücümlerni yañıdan başlaycaq, ABD israr etken teneffüske endi riayet etmeycek, dep bildirdşrgen edi.
Onıñ aytqanına köre, Ukrayina Vaşingtonnıñ istegini yerine ketirmek içün üç kün devamında Rusiyeniñ energetika obyektlerine ücüm etmegen. Bu arada Rusiye Ukrayina energetika obyektlerine ücüm etmege devam etti, soñki afta içinde onıñ ücümleri 100-den ziyade adamnı öldürdi.
Prezidentniñ aytqanına köre, teneffüske baqmadan, Ukrayina Rusiyeniñ ballistik raketaları atılğanı aqqında Amerika haberlerinden marum qaldı, "Starlink"niñ sıñırlavları ise cebe saflarındaki areketlerge keder etti. Prezident bular tehnikiy meseleler olğanına inanmay.
Orta küzniñ 11-de ABD prezidenti Donald Tramp içtimaiy ağlarda eki taraf da energetik tınçlıqqa razı olğanını bildirdi.