Rusiye Baş prokuraturası Washingtonda merkezi olğan Freedom House ükümetten tış aq qorçalayıcı teşkilâtını «istenilmegen» dep tanıdı.
Rusiye müessisesi qayd etkenine köre, Freedom House Ukrayına ordusına er taraflama yardım köstermesine, Ukrayına içün «buzlatılğan» Rusiye aktivleriniñ musadere etilmesine, sanktsion basqınıñ quvetleştirilmesine çağıra.
Freedom House 1941 senesi quruldı. 40 yıldan berli teşkilât dünyada siyasiy ve vatandaş serbestliginiñ vaziyetini tedqiq ete.
Devlet dumasınıñ iç işlerge kirişüv tahqiqatı komissiyasınıñ yolbaşçısı Vasiliy Piskarev martnıñ başında bildirgenine köre, Rusiye akimiyeti Freedom House teşkilâtınıñ «istenilmegenler» cedveline kirsetüv meselesini inceleycek. Piskarev aq qorçalayıcılarnı 2024 senesi Rusiyedeki prezident saylavları sahte dep adlandırılğan Freedom House teşkilâtınıñ maruzası sebebinden «Rusiyede saylavlarnı itibardan tüşürgeninde» qabaatladı, dep hatırlata «Meduza».
«İstenilmegen teşkilâtlar» cedveli Rusiyede 2015 senesinden berli bar. Al-azırda anda 160 qurulış qayd etilgen. Bu cedvelde olğan teşkilâtlarnen işbirligi sebebinden em memuriy, em cinaiy mesüliyet bar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
