Siyasetşınas Fedor Kraşeninnikov, siyasiy faalerniñ para cezalarına aqça toplamaq içün "Rosştraf" Telegram kanalınıñ yaratılğanı aqqında ilân etti. Bunı o, öz Telegram kanalında yazdı. "Novaya Gazeta"nen subetleşkende ise, o, bu leyhanıñ moderatorlarından birisi olğanını qayd etti, dep yaza Azatlıq Radiosı.
Kraşeninnikovnıñ aytqanına köre, rusiyeliler belli adamlarğa büyük istek ile aqça yollay. Amma bir depressiv rusiye şeeriniñ onlarca biñ rublege cezalanğan sakininiñ alı daa müşküldir, dey siyasetşınas.
"Rosştraf" leyhası yardım etecek birinci faal - Kemerovskaya vilâyetinde yaşağan saqat İlya Putövskiydir. Bu yıl yazda oña, akimiyetke ürmetsizlik içün 30 biñlik para cezasını üküm ettiler. Onı, "VKontakte" içtimaiy ağında "O, bizge çar degil" narazılıq aktsiyasınıñ dağıtıluvınıñ repostı ve Putin aqqında yazğan tefsirinde qabaatladılar. Bundan soñ akimiyetke ürmetsizlik manaçığınen faalge qarşı daa eki dava açıldı, amma keççe olarnı qapattılar. Putövskiy, davalarnı aşkâr ve içtimaiy ağlarnıñ qullanıcılarınıñ açuvı içün qapattılar, dep tüşüne.
Noyabr 20-sinde Yekaterinburg mahkemesi, Telegram kanalında yazı içün akimiyetke ürmetsizlikte qabaatlap, Födor Kraşeninnikovnıñ özüne 30 biñge cezaladı.
Cemiyet, devlet timsalleri ve akimiyet organlarına qarşı ürmetsizlik qanunı, mart 29-ında amelge keçti. Onıñ bozması içün 300 biñge qadar para cezası ya da 15 künge qadar memuriy tevqif üküm etile bile.
