İyülniñ 18-nde, bazar künü, Moskvada ve Gatçinde (Leningrad vilâyeti) faaller Rusiyede taqip etilgen qırımtatarlarnıñ destegine bir kişilik piketler keçirdi.
«Strategiya 18» teşebbüsiniñ malümatına köre ananeviy er aylıq aktsiya keçenlerde Moskvanıñ Arbatında olıp keçken.
«Bulat Okucavanıñ abidesi. Qırımtatarlarğa destek olaraq, olarnıñ esassız cinayet taqibine qarşı, Qırım ve Rusiyeniñ FSİN sistemasındaki siyasiy mabüslerge koronavirus pandemiyası şaraitinde tibbiy yardım kösterilmesi ile bağlı deşetli vaziyetke qarşı bir kişilik piketler...», – dep yazıla faallerniñ bildirmesinde.
Adamlar «Rusiye apishanelerinden qırımtatarlarnıñ sürgün etilmesine yoq» ve «qırımtatarlar terrorcılar degil» yazılarınen dava mabüsleriniñ resmilerinen plakatlar tuta ediler.
Bundan ğayrı qırımtatarlarnıñ destegine aktsiya Gatçinde de olıp keçti.
Qollarında faaller plakatlar ve qırımtatar ve ukrain bayraqlarını tuta edi.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
