Rusiye Devlet duması 1945 senesi Ekinci cian cenkiniñ bitüv kününi sentâbrniñ 2-nden 3-ne deñiştirgen qanunnı qabul etti, dep haber ete Azatlıq Radiosı.
Qanun leyhasınıñ müellifleri Sovet Sotsialistik Cumhuriyetler Birligi Yuqarı Şurası prezidiumınıñ 1945 senesi sentâbrniñ 2-nde çıqarğan emrine esaslana, oña köre sentâbrniñ 3-ü Yaponiyanı yeñüv künü olaraq ilân etile.
«Sentâbrniñ 3-ü ibaresi – Ekinci cian cenkiniñ bitüv künü (1945) «cenkten barışıqqa keçüv, barışuv ve işbirligi yollarını qıdıruvnı timsal etmekte», – dep aytıla iza tezkeresinde.
Bütün dünyada Ekinci cian cenkiniñ bitüv künü 1945 senesiniñ sentâbrniñ 2-si sayıla. O künü Yaponiya şartsız teslimiyet aktını imzalağan edi.
Rusiye işğal etken Qırımda 2014 senesinden berli sovetlerniñ ve Rusiyeniñ «Zafer künü» Qızıl ordu ve sovet halqınıñ natsist Almaniyası üzerindeki ğalebe künü olaraq qayd etile. Ukrainada mayısnıñ 8-nde Hatıra ve barışuv künü qayd etile, mayısnıñ 9-ı ise – Ekinci cian cenkinde natsizmni yeñüv künü olaraq.
