Fevral ayınıñ başından berli işğal etilgen Qırımda tutulğan Ukraina vatandaşı Galina Dolgopolaya Rusiyeniñ angi yerinde tutulğanına dair resmiy bir malümat yoq. Bu aqta Ukraina ombudsmeni Lüdmila Denisova Facebookta haber etti.
«Rusiye İnsan aqları vekâletlisi Tatyana Moskalkovağa muracaat etip, Galina Dolgopolayanıñ bulunğan yerini tasdıqlamasını, em de aqlarına riayet etilgenini teşkermesini rica etem, çünki tuvğanları ve advokatlar sağlıq vaziyeti, uquqiy ve tibbiy yardımnen temin etilgeni aqqında bir şey bilmey», – dep yazdı Denisova içtimaiy ağlarda.
Ukraina ombudsmeniniñ malümatına köre, Ukraina vatandaşı tutulğan soñki yer «Moskva şeerindeki Rusiye Cezalarnı yerine ketirüv federal hızmetiniñ 2 SİZOsı».
Yanvarniñ başında Qırım aq qorçalayıcı gruppası, 2019 senesi noyabr ayında Rusiye FSBsi «devlet hainliginden» şübheli sayıp tutqan qadın 64 yaşında Aqyar sakini Galina Dolgopolaya ola, dep ögrendi.
Aq qorçalayıcılarnıñ bildirgenine köre, Rusiye FSBsi qadınnı «Ukraina mahsus hızmetleri celp etti» ve o, «Baş istihbarat idaresiniñ vazifesine köre gizli arbiy malümat toplağan edi», dep qabaatladı.
Daa evel berilgen malümatqa köre, 2019 senesi noyabr ayında Rusiye kontrolindeki Aqyar Lenin rayon mahkemesi Ukraina içün casuslıq yapqanından şübheli sayılğan qadınnı eki ayğa – 2020 senesi yanvarniñ 26-na qadar apiske aldı. Bu aqta apiske alınğan kişiniñ şahsiy malümatı qayd etilmeden mahkeme saytında haber etilgen edi.
Qadın Rusiye Ceza kodeksiniñ 275-inci maddesine istinaden qabaatlana. Oña köre, 12 yıldan 20 yılğa qadap apis cezası berilmesi mümkün.
