Rusiyede avgustnıñ 26-nda 798 insan koronavirus yuqunçından vefat etti, dep haber ete Azatlıq Radiosı operativ ştabnıñ malümatına esaslanıp.
Bu raqamlar bir kün evelsi olğanlardan az, keçken künü pandemiya devamında rekord qayd etildi – bir künde 820 insan vefat etti. Bundan evelki rekord avgustnıñ 14-nde qayd etilgen edi: resmiy malümatqa köre, keçken künü 819 hasta vefat etti. Bir yıl evelsi Rusiye akimiyeti pandemiya yeñildi, dep ilân etti, lâkin aşılanğanlarnıñ sayısı az olğanı içün ve yañı ştammlar tarqalğanı içün hasta sayısı dört qat arttı, vefat etkenlerniñ sayısı keçken yazğa baqqanda altı qat arttı.
Avgustnıñ 26-nda Rusiyede 9509 yañı hasta qayd etildi. Pandemiya vaqtında resmiy vefat sayısı 180 000-den çoq oldı.
Mustaqil demograflar ve statistika tedqiqatçıları vefat sayısı 3,5 qat yüksek olğanını aytıp, 600 000 insan vefat etkenini tüşüne.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
