Rusiye qayd etilgen koronavirus adiseleriniñ sayısına köre Qıtaynı ozıp keçti. Memleketniñ yuqunç tarqaluvı ile küreş operativ ştabınıñ malümatına köre, memlekette 87147 hasta qayd etildi. Pandemiya başlağan Qıtayda ise 83912 hasta qayd etildi, dep bildire Baltimoredeki Johns Hopkins Universiteti, dep haber ete Azatlıq Radiosı.
Bir künde Rusiyede 6 361 hasta qayd etildi. 50 kişi vefat etti. Hastalıq qırğınlığı başlağanından berli 794 insan vefat etti, 7 364 tüzelip yahşı oldı.
55 059 hasta Moskva ve Moskva vilâyetinde qayd etildi. Sankt-Peterburgda 3 238 hasta bar, Nijegorod vilâyetinde – 1 574. Rusiye prezidenti Vladimir Putinniñ matbuat kâtibi Dmitriy Peskovnıñ bazarertesi künü «Argumentı i faktı» gazetasına bergen intervyüsında bildirgenine köre, Kreml koronavirus yuqunçı hastalığınıñ platosı mayısnıñ ortasında olacaq, dep bekley.
Rusiye cemaat fikrini ögrenüv merkezi keçirgen sorav iştirakçileriniñ yüzde qırqı koronavirus yuqunçına oğrav telükesini alçaq dep saya, dep bildirdi. Cevap bergenlerniñ qırq sekizi hastalansa, olar içün aqibetler ağır olacaq, dep bildirdi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
