Soñki künü Rusiyede 3388 yañı koronavirus hastası qayd etildi. 28 insan vefat etti. Bu aqta aprelniñ 15-nde koronavirus yuqunçınıñ tarqaluvına qarşı tedbirler operativ ştabı bildire, dep haber ete Azatlıq Radiosı.
Qırğınlıq başlağanından berli 24 490 COVID-19 hastası qayd etildi. Vefat etkenlerniñ sayısı 198 oldı. Moskvada 1774 kişi hastalandı, Moskva vilâyetinde – 272. Hasta sayısına köre üç lider arasında Murmansk vilâyeti kire – anda 137 koronavirus hastası bar.
Region soñki künde 130 hastalanğan Sankt-Peterburgdan ögde kele.
Rospotrebnadzor malümatına köre, koronavirus şübhesi ile tibbiy közetüv altında 130 biñden çoq insan buluna. Bir buçuq milliondan çoq test yapıldı.
Dünyada COVID-19 hastalarınıñ sayısı eki millionnı aştı. 125 biñden çoq hasta öldi. Eñ çoq hasta ABDde qayd etildi – 600 biñden çoq. Qırğınlıq başlağanından berli Amerika Birleşken Devletlerinde 26 biñden çoq insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
