Rusiyede koronavirusnen hastalanğanlarnıñ sayısı 50 biñni aştı, dep bildirdi koronavirus yuqunçınıñ tarqaluvı ile küreş operativ ştabı. Umumen qırğınlıq başlağanından berli 52 763 insan hastalandı, 29 433-ü Moskvada hasta oldı, dep haber ete Azatlıq Radiosı.
Qırğınlıq başlağanından berli memlekette 456 insan (51-i bir künde) vefat etti. 3873 kişi tüzeldi.
Koronavirus hastaları Rusiyeniñ bütün regionlarında qayd etildi. Hasta sayısına köre ilk onğa Moskvadan ğayrı Moskva vilâyeti (5959), Sankt-Peterburg (1973), Nijegorod vilâyeti (860), Kömi Cumhuriyeti (507) kirgenler.
Rospotrebnadzor malümatına köre, Rusiyede aprelniñ 21-ne qadar 2,14 milliondan çoq koronavirus testi yapıldı (bir künde +90 biñ test).
Operativ ştab malümatına köre, yañı koronavirus hastalarınıñ 45%-ından çoqunıñ klinik hastalıq alâmetleri yoq edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
