Mayısnıñ 2-nde olğan malümatqa köre, soñki künde Rusiyede 9623 yañı koronavirus hastası qayd etildi. Bu rekord oldı, dep haber ete «Nastoyaşçeye Vremâ».
Memlekette hastalarnıñ umumiy sayısı 124 biñ insan oldı. Yañı COVID-19 hastalarınıñ yüzde 47-siniñ hastalığı alâmetsiz keçe.
Eñ çoq yañı hasta Moskvada (+5358), Moskva vilâyetinde (+807), Sankt-Peterburgda (+323), Nijniy Novgorod (+320) ve Murmansk (+143) vilâyetlerinde qayd etildi.
Bir künde 57 hasta vefat etti. Keçken künge köre vefat sayısı bir buçuq qat eksildi. Mayısnıñ 1-nde 96 insan vefat etti. Rusiyede qayd etilgen vefat sayısı 1222 oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
