Rusiyede martnıñ 1-nde, cenkniñ altıncı kününde, soqaqlarda cenkke qarşı aktsiyalar devam etti. Polis 25 şeerde – Moskva, Sankt-Peterburg, Ufa, Novosibirsk ve digerlerinde yüzlernen insannı tuttı, dep haber ete Azatlıq Radiosınıñ rus hızmeti.
Qayd etilgenine köre, Peterburgda Gostinıy dvor ögünde tahminen 100 kişi tutuldı.
«OVD-İnfo» malümatına köre, Rusiye Ukrainağa ücüm etken soñ cenkke qarşı aktsiyalarnıñ 6500-den çoq iştirakçisi tutuldı.
Moskva şeer yolbaşçısı Sergey Sobânin blogunda yazğanına köre, «Ukrainağa fayda çağıruvlarına qoltutmağan» restoran, tükân, musafirhane ve diger müessiselerniñ saytları «telüke, feyk ve şikâyetlerge» oğratıla eken.
«Bunıñ arqasında professionallar ve büyük sistema qurulışları tura», – dep bildire Sobânin. Şeer yolbaşçısınıñ aytqanına köre, «soqaq qalabalıqlarını teşkil etmek ıntıluvları» ardı-sıra toqtatılacaq.
Ukrainada cenk vaziyeti devam ete. Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Prezident Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net.
