O, ağır ayaqlı olğanı içün hızmetni qaldırdı. Bu cinaiy maddege köre arbiy qadınğa çıqarılğan ilk üküm oldı, dep yaza «Kommersant».
Mahkemede Kabaloyeva bölüginiñ tibbiy rotasında baqıldı ve ekimler ağır ayaqlı olğanı içün vaqtınca hızmetten ayırılmağa tevsiye etti, dep tarif etti. O, tibbiy rota bu malümatnı komandanlığına yetkizer, dep emin edi, amma bu yapılmadı.
Arbiy prokuratura vekili Kabaloyeva işten çıqmadı ve aşlıq almağa, imtiyazlardan faydalanmağa devam etti, dep bildirdi. Yani hızmetine devam etti ve bıltır sentâbr ayında seferberlik ilân etilgen soñ rotağa kelmek kerek edi.
Bu maddeniñ cezası 10 yıl qadar apis cezası berilüvini belgilemekte. Vladikavkaz garnizon arbiy mahkemesi Kabaloyevanı altı yıl umumiy rejim koloniyasında qalmasına üküm etti. Beş yaşında balası olğanı içün cezanıñ yerine ketirilüvi 2032 senesine qaldırıldı.
Advokat Roman Rabadanov ükümge qarşı itiraz bildirdi. Onıñ fikirince, mahkeme şaat olaraq sorğuğa çekilgen rota komandanı ve diger arbiyler cinaiy davanıñ neticesinde merağı olğan insanlar olğanına qulaq asmadı. Mahküm ükümge itiraz bildirmege istemeyip razı oldı, dep ayttı advokatı. Cenübiy okrugınıñ arbiy mahkemesi ükümni deñiştirmedi.
2022 senesi küzde Rusiyede ilân etilgen seferberlikten soñ Ceza kodeksiniñ maddelerine deñişmeler kirsetildi. Hususan arbiy hızmetten vazgeçüv ve kelmeme sebebinden cezalar quvetleştirildi.
Garnizon arbiy mahkemeleri böyle davalarnı baqıp, Rusiye prezidenti seferberlik bitkenine dair buyruq çıqarmağanına esaslana. Böylece seferberlik devam ete, yani silâlı quvetlerden ayırılmaq imkânsız ola.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
