Rusiye Federatsiyasınıñ Belgorod vilâyetindeki Şebekino şeerinde ücüm neticesinde üç insan zarar kördi, dep bildirdi region gubernatorı Vâçeslav Gladkov.
Onıñ aytqanına köre, ukrayin uçucısız uçaqlarınıñ ücümleri neticesinde elektrik ağları zarar kördi, Şebekino şeerinde, Necegol ve Rjevka köylerinde elektrikler qısmen söndürildi.
Rusiye telegram kanalları iyünniñ 10-na keçken gecesi Rusiye Federatsiyasınıñ Yaroslav vilâyetinde pilotsız uçaqlarnıñ tüşürilüvi aqqında yazdı.
Mariupol şeer yolbaşçısınıñ mesleatçısı Pötr Andüşçenkonıñ bildirgenine köre, uçucısız uçaqlar Novo-Yaroslav neft zavodına ücüm etmege tırıştı. O, Ukrayina sıñırından tahminen 1 biñ kilometr mesafede buluna.
İyünniñ 10-nda saba Qazan ava limanı telükesizlik sebebinden işini toqtattı. Uçaqlar, Nijnekamsk ve Samara yedek aerodromlarına yollanıldı, dep qayd ettiler Rusiye aviatsiyasında.
Rusiye Mudafaa nazirligi bildirdi ki, iyün 10-na keçken gecesi Bryansk vilâyetine ücüm etildi, region üzerinde ava mudafaası vastaları ile dört uçucısız uçaq tüşürildi.
Ukrayina akimiyeti bu malümatnı şimdilik izaatlamadı.
Muarririyetniñ bu malümatnı mustaqil menbalardan teşkermek imkânı yoq.
Rusiyeniñ Ukrayinağa tam miqyaslı istilâsı başlağan soñ, Rusiye regionlarına muntazam sürette arbiy dronlar kele, neticede viranlıq ve elâk olğanlar bar. Rusiye Mudafaa nazirligi, ücümler Ukrayina tarafından yapılğanını iddia ete. Kıyiv bu haberlerni izaatlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
