Rusiyede soñki künde 6719 koronavirus hastası qayd etildi. Bu bir kün evelsi olğanından bir qaç on qat az, ve aprel ayından berli eñ az raqamdır. Soñki künleri yañı hastalarnıñ sayısı bayağı stabil – 7 biñden az. Umumen qırğınlıq başlağanından berli Rusiyede 640 biñden çoq hasta qayd etildi, dep haber ete Azatlıq Radiosı.
Bir künde 93 insan koronavirus yuqunçından vefat etti, memleketniñ Operativ ştab malümatına köre, bu müddet devamında ölüm sayısı 9 biñden çoqtır (koronavirus ölümniñ esas sebebi olaraq tanılğan vefatlar aqqında aytıla).
Faal yuqunç sayısı bayağı arttı (raatlıq künleri daa az insan hastahaneden çıqa) – şimdi olarnıñ sayısı 228 560 kişi oldı.
Sankt-Peterburgda bugünden başlap karantin tedbirleri lâğu etile. Moskvada çoqusı sıñırlavlar lâğu etildi.
Rusiye dünyada qayd etilgen hastalarnıñ sayısına köre üçünci yerde buluna. Umumen dünyada 10 milliondan çoq kişi hastalandı, 500 biñ vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
