Rusiyede soñki künde 954 yañı koronavirus hastası qayd etildi. Bu operativ ştabnıñ resmiy malümatıdır. Qırğınlıq başlağanından berli eñ yüksek raqam oldı. Bir kün evelsi 658 yañı hasta qayd etildi. Bir künde eki insan koronavirus yuqunçından vefat etti, 51-i tüzeldi, dep bildire Azatlıq Radiosı.
85 regiondan 80-inde (işğal altındaki Qırım ve Aqyar da sayıla) eñ az birer hasta qayd etildi. Rusiyede hastalarnıñ sayısı 6343 oldı, 47 insan vefat etti, 406-sı tüzeldi. Eñ çoq hasta Moskvada qayd etildi – 4 biñden çoq.
Hastalarnıñ sayısına köre Rusiye dünyada on ekinci yerde buluna.
Resmiy malümatqa köre, Rusiyede qırğınlıq vaqtında aman-aman 700 biñ koronavirus testi yapıldı, yani yuqunç test yapılğan insanlarnıñ yüzde birinde qayd etildi. Ealiniñ bir millionına 5 biñ test bar, bu dünyağa köre orta bir köstergiçtir (ABDden biraz az).
Martnıñ soñundan berli Rusiyede tatil künleri rejimi devam ete, regionlarnıñ ekseriyetinde özüni tecrit etüv rejimi ilân etildi (aslında, karantin aqqında aytıla, amma akimiyet onı öyle adlandırmay).
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
