Rusiyede bir künde qayd etilgen koronavirus hastalarınıñ sayısı 2558 oldı, dep haber ete Azatlıq Radiosı.
COVID-19 hastalarınıñ sayısı 18328-ge arttı.
Eñ çoq hasta Moskvada qayd etildi – 1355. 495 – Moskva vilâyetinde, 121 – Sankt-Peterburgda.
Bir künde 18 hasta vefat etti. Qırğınlıq başlağanından berli 148 insan can berdi.
COVID-19 pandemiyası sebebinden Rusiyeniñ aman-aman bütün regionlarında yüksek seviyeli azırlıq rejimi ilân etildi. Cemaat yerleri çalışmay, tedbirler lâğu etildi, oquv yurtları qapatıldı.
Dünyada COVID-19 hastalarınıñ sayısı eki millionğa yaqınlaşa. 114 biñden çoq insan vefat etti.
Eñ çoq hasta ABDde qayd etildi – 560 biñden çoq, 22 biñden çoq insan vefat etti. Tarihta ilk sefer 50 ştatta felâket vaziyeti ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
