Rusiyeniñ 52 regionında aprelniñ 11-nde qayd etilgen COVID-19 koronavirus hastalarınıñ sayısı 2186-nı aştı. Bu aqta qırğınlıq ile küreş operativ ştabı bildire.
Eñ çoq hasta Moskvada qayd etildi – 1306. 278 – Moskva vilâyetinde, 69 – Sankt-Peterburgda, dep haber Azatlıq Radiosı.
82 regionda hastalarnıñ sayısı 15700-ge arttı.
Keçken künü 24 insan vefat etti. 14-ü – Moskvada. Rusiyede qırğınlıq başlağanından berli 130 kişi öldi.
Moskvada hastalarnıñ sayısı 10 biñni aştı. Memleket boyunca eñ büyük raqam mında qayd etildi. Şeerde bazarertesi künü, aprelniñ 13-nde, er angi naqliyatnen, şahsiy olsa bile, çıqmaq içün mahsus kirişlikler kirsetile.
Aprelniñ 15-nden başlap vesiqa mecburiy olacaq. Amma soqaqta cayav yürmek içün mahsus izin şimdilik kerekmey.
Yañı sıñırlavlarnı Moskva şeer yolbaşçısı Sergey Sobânin tasdıqladı. Onıñ aytqanına köre, kirip-çıquv rejimi – mecburiy adımdır. Akimiyet buqararnı Moskva sakinleri özüni izolâtsiya etüv rejimini bozğanı içün qabul etti.
Kirişlik online ya da telefon vastasınen berile.
Kirip-çıquv rejimi aprelniñ 30-na qadar devam etecektir. Daa evel Moskva akimiyeti qırğınlıq sebebinden pensioner ve mektep talebeleri içün cemaat naqliyatına bedava minüvni lâğu etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
