Soñki künde Rusiyede (işğal altındaki Qırım da sayıla) COVID-19 hastalarınıñ eñ büyük sayısı qayd etildi – 17 717. Bu aqta yuqunç tarqaluvı ile küreş operativ ştabı bildire, dep haber ete Azatlıq Radiosı.
Bir künde 366 koronavirus hastası vefat etti, bu antirekord oldı. Rusiyede COVID-19-dan vefat etkenlerniñ umumiy sayısı 27 301 oldı. Bir künde aman-aman 15 biñ kişi tüzeldi.
Rusiye baş nazir muavini Tatyana Golikovanıñ aytqanına köre, 16 Rusiye regionında COVID-19 hastaları içün boş yer vaziyeti kritik ola, beş subyektte koronavirus hastahaneleriniñ 95%-ı tolu.
Rusiyede, Golikovanıñ aytqanına köre, koronavirus hastaları içün bugünki künde 223 biñden çoq yer açıldı, 123 biñi oksigen berilüvinen temin etildi ve 28 biñden çoqu aqcigerni suniy avalandıruv cihazınen donatıldı. Tünevin saba yerlerniñ 19 fayızı boş edi, dep bildirdi baş nazir muavini.
Gölikovanıñ çıqışından soñ prezident Vladimir Putin COVID-19 hastaları içün yer açıp, regionlarğa koronavirus ile küreşmeleri içün 10 milliard ruble daa ayırmağa emir berdi.
