Rusiyede bir künde 2774 yañı koronavirus hastası qayd etildi. 22 kişi vefat etti, dep haber ete Azatlıq Radiosı.
Qırğınlıq başlağanından berli Rusiyede 21102 COVID-19 hastası qayd etildi. Ölgenlerniñ sayısı 170-ke arttı. Moskvada 1016 insan vefat etti, Moskva vilâyetinde 75 kişi öldi, Sankt-Peterburgda 78 insan vefat etti. Bu üç region hastalarnıñ sayısına köre lider ola, faqat bir künde qayd etilgen hasta sayısı keçken künlerge köre daa az oldı.
Dünyada COVID-19 hastalarınıñ sayısı eki millionğa yaqınlaşa. 118 biñden çoq hasta vefat etti. Eñ çoq hasta ABDde qayd etildi – aman-aman 580 biñ. Keçken künü anda 19 biñden çoq yañı koronavirus hastası qayd etildi, biñden çoq insan vefat etti. Amerika Birleşken Devletlerinde vefat etkenlerniñ sayısı 23 biñni aştı. Qırğınlıqtan eñ büyük zarar körgen ştat New York oldı. Anda 195 biñden çoq hasta bar, 10 biñden çoq insan vefat etti. Ştat valisiniñ aytqanına köre, yuqunç tarqaluvı kontrol altına alındı ve qırğınlıqnıñ eñ qorqunç etapı, onıñ aytqanına köre, belki de, artta qaldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
