Aprelniñ 17-nde berilgen malümatqa köre, Rusiyede bir künde 4070 yañı koronavirus hastası qayd etildi, hastalarnıñ umumiy sayısı 32 008 insan oldı, dep bildirdi koronavirus ile küreş operativ ştabı. Koronavirus Rusiyeniñ bütün regionlarında bar – Altay Cumhuriyeti soñki oldı. Bu aqta Nastoyaşçeye Vremâ bildire.
Qırğınlıq vaqtında vefat etkenlerniñ sayısı 273-ke arttı.
41 kişi soñki künde öldi. 2590 insan tüzeldi.
Rusiyede aprelniñ 16-na qadar 1,7 million koronavirus testi yapıldı, dep bildirdi Rospotrebnadzor.
Moskva koronavirus hastalarınıñ sayısını köre birinci yerde qala. Paytahtta bir künde 1959 insannıñ diagnozı tasdıqlandı. Moskva vilâyetinde 472 yañı hasta bar.
Moskva şeer yolbaşçısınıñ muavini Anastasiya Rakovanıñ bildirgenine köre, koronavirus hastalığınıñ zirvesi Moskvada kelecek eki-üç aftada olacaq.
«Yaqın vaqıt bizim içün eñ zor olacaq. Hastalıq zirvesi kelecek eki-üç aftada olacaqtır», – dedi Rakova. Onıñ aytqanına köre, soñki vaqıtları Moskva sağlıq sistemasınınıñ «işi qat-qat arttı».
Soñki künde Moskvada koronavirusı ve pnevmoniyası tasdıqlanğan daa 14 kişi vefat etti, paytahtta COVID-19 qurbanlarınıñ sayısı 113-ten 127-ge arttı, dep bildirdi koronavirus ile küreş operativ ştabı.
Qayd etilgenine köre, vefat etkenlerniñ yaşı 29-dan 88-ge qadar edi. Hastalarnıñ çoqusında diger hastalıqlar bar edi, hususan gipertoniya, kardioskleroz, aterosklerotik anevrizma. Beş kişiniñ şeker hastalığı bar edi.
Bir kün evel Moskvada bir künde vefat etkenlerniñ sayısı eki qat az edi – 7, hastalar 36 yaşından 86 yaşına qadar edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
