Rusiyede oktâbrniñ 23-nde saba 17 340 yañı COVID-19 hastası qayd etildi – bu epidemiya başlağanından rekord sayı ola. Bu aqta Rusiyeniñ koronavirus ile küreş operativ ştabı bildirdi, dep haber ete Azatlıq Radiosı.
Rusiye statistikasına işğal etilgen Qırım ve Aqyarnıñ hastaları da qoşula.
Bundan evel eñ büyük hasta sayısı Rusiyede oktâbrniñ 20-nde qayd etildi – bir künde 16 biñden çoq hasta.
Soñki künde COVID-19 diagnozı tasdıqlanğan 283 hasta vefat etti, 11 263 hasta tüzeldi.
Eñ çoq hasta Moskvada qayd etildi – 5 478. Rusiyede umumiy hasta sayısı – 1480646.
Dünya sağlıq teşkilâtı oktâbrniñ 22-nde dünyada eñ büyük rekord COVID-19 hastasını qayd etti – 423 819.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
