Rusiyeniñ Solikamsk şeerindeki «Ural» barot zavodında patlav oldı.
TASS Perm ülkesindeki Fevqulâde vaziyetler nazirliginiñ Baş idaresine esaslanıp bildirgenine köre, patlav aqqında saat 13:25-te haber etildi, adise yerine 44 insan ve 11 dane tehnika keti.
Rusiye Fevqulâde vaziyetler nazirligi bildirgenine köre, yaralanğanlar yoq, çünki patlav vaqtında binada kimse yoq edi, müessise işine ise patlav tesir etmedi.
Prikamye territoril telükesizlik nazirligi patlav olğan tsehte camlar ve qapular qırıldı, dep bildirdi. «Tseh avtomatik rejimde çalışa, yaralanğanlar yoq, eali içün bir telüke de yoq», – dep bildirdi regional nazirlik.
Solikamsktaki «Ural» – Rusiyede barot zavodlarından biridir, anda mayın atıcı, granata atıcı, idare etilgen ve etilmegen raketalarda qullanılğan snarâdlar içün de barot yapıla.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
