Rusiyede Rostov-na-Donu şeeriniñ Cenübiy okrugınıñ arbiy mahkemesinde ekinci Bağçasaray "Hizb ut-Tahrir davası" boyunca oturışta imaye tarafı, qabaatlav tarafınıñ birinci şaatını - Qırımda Rusiye FSB-siniñ hadimi Nikolay Artıkbayevni sorğuğa çekip başladı.
Advokat Ayder Azamatovğa köre, Artıkbayev, advokatlarnıñ suallerine cevap bergende, pek eyecanlana edi ve cevaptan qaça edi.
"Tafsilâtlı sualler olğanı içün, şaatnıñ eyecanlanğanı, telâşlanğanı körüne edi. Ve qolaysız suallerge, hatırlamay, bilmey ve buña oşağan cevaplar berip, ya da cevap bermeycek edi, ya da, añlağanıma köre, yalan aytacaq edi", - aytıp berdi Azamatov.
Daa, advokatnıñ fikrince, mahkeme "qolaysız suallerni" inkâr ete edi.
"Misal içün, qabaatlav hulâsasında, qabaatlav tarafına köre, Qırımda akimiyetni zapt etmek içün, yarımada eali 50% musulmanlardan ibaret olmalı. Men ise, bu 50% peyda olsun dep, ne qadar vaqıt kerek olğanını soradım. Mahkeme, bu sual davağa ait degil dep, onı inkâr etti. Amma mence bu sualniñ davağa aitligi bar", - dep qoştı advokat.
Noyabr 15-inde Rostov-na-Donu şeeri Cenübiy okrugınıñ arbiy mahkemesi, ekinci Bağçasaray "Hizb ut-Tahrir davası"nı baqıp başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
