Rusiyede, sentâbr 7-sinde Rusiye-Ukraina mabüsler almaşuvı neticesinde azat etilgen ukrain deñizcilerniñ cinaiy davasınıñ tahqiqatını toqtatmadılar.
Bunı öz Facebook saifesinde Rusiye advokatı Nikolay Polozov yazdı.
"Bugün (sentâbrniñ - 16 - QA) ukrain deñizcilerniñ davası boyunca Rusiye FSB-siniñ Tahqiqat idaresine bardım. Ukrain deñizcilerniñ davaları, olarnıñ azat etilgeninden soñ da devam ete. Rusiyede olarğa qarşı cinaiy davanıñ tahqiqatı toqtatılmadı. Olar alâ daa qabaatlanğanlar statusında buluna, taqımımıznıñ advokatları, olarnıñ imayesini devam ete", - yazdı Polozov.
Onıñ aytqanına köre, şimdilik dava, cinaiy davanıñ malümatınen tanışuv basamağındadır.
"Advokatlarımız malümatnen tanış ola. Bizim maqsadımız - azat etilgen deñizciler içün er türlü menfiy yuridik aqibetlerni yoq etmektir", - qoştı Polozov.
Halqara deñiz uquqı mahkemesi mayısnıñ 25-nde Gamburgda Rusiye zapt etken ukrainalı deñizcilerniñ davası baqılğan toplaşuvda Rusiyeni arbiy gemilerni acele azat etip, Ukraina kontroline qaytarmasına qarar berdi.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı.
Oleğ Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
