Rusiye prezidenti Vladimir Putin askerlikke mecbur olğanlarnıñ yekâne elektron bazası aqqında buyruqnı imzaladı. Vesiqa Rusiye uquqiy malümat saytındaderc etildi.
Bazağa arbiy esapta olğan ya da olması kerek olğan vatandaşlar kaqında malümat kirsetilecek. Rusiye tış istihbarat hızmeti ve yedekteki FSB zabitleri aqqında malümat istisna ola, dep haber ete Azatlıq Radiosı.
2022 senesi dekabrniñ 30-na qadar Rusiyedeki regional akimiyet Mudafaa nazirligi ve Raqamlar nazirliginen beraber arbiy komissarlıqlarnıñ bütün malümatlarını elektron şekilge çevirmeli. Soñra askerlikke mecbur olğanlarnıñ umumiy cedvelini Federal bergi hızmetiniñ malümatınen toldurılacaq. Anda Rusiye Sağlıq nazirligi, İç işler nazirligi, Fevqulâde vaziyetler nazirligi, Cezalarnı yerine ketirüv hızmeti, Federal mahkeme vekilleri hızmeti, Tasil ve ilim nazirligi, Köy hocalığı nazirligi, Maarifçilik nazirligi, Sport nazirligi, Merkeziy saylav komissiyası ve Pensiya fondunıñ malümatı kirsetilecek.
Baza 2024 senesi aprelniñ 1-nden işletilmeli – Rusiyede baarde askerlikke aluv başlağan soñ.
Qırım.Aqiqat bildirgenine köre, işğal altındaki Qırımda Rusiye ordusına gizliden seferber etmege devam eteler. Qırımtatar Milliy Meclisiniñ reisi Refat Çubarov Qırımda evelden tizilgen cedvellerge köre kene celpnameler berile, dep bildirdi.
Oktâbrniñ 31-nde Rusiye prezidenti Vladimir Putin «qısmiy» seferberlik bitti, dep bildirdi. Lâkin buyruq imzalanmadı. «Vatandaş ve ordu» Rusiye aq qorçalayıcı teşkilâtınıñ reberi Sergey Krivenkonıñ Qırım.Aqiqatqa bildirgenine köre, Vladimir Putin seferberlikni toqtatmağa istese, ferman çıqarır edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
