Rusiyeniñ paytahtı Moskvada 92 yaşında olğan aq qorçalayıcı, Moskva Helsinki gruppasınıñ yolbaşçısı Lüdmila Alekseyeva vefat etti, dep haber ete Radio Svobodanıñ rus hızmeti.
Alekseyevanıñ vefatı aqqında Prezidentniñ insan aqları şurasınıñ reisi Mihail Fedotov 15-inci Moskva şeer hastahanesi baş ekiminiñ malümatına esaslanıp bildirdi. Onıñ aytqanlarını «İnterfaks» bildire.
Fedotovnıñ aytqanına köre, aq qorçalayıcı cuma künü hastahane odasından çalışıp, yardımcısına vazifeler bere edi.
Alekseyeva 1960-ıncı yılları Sovetler Birliginde aq qorçalayıcı areketiniñ esasçılarından biri edi. 1977 senesi samizdatnı tarqatqanı içün apiske alınmaq telükesi bar olğanından Amerika Birleşken Devletlerine köçmege mecbur edi, anda 1993 senesine qadar yaşadı. 1996 senesi Moskva Helsinki gruppasınıñ reisi olaraq saylandı.
Lüdmila Alekseyeva Rusiye prezidenti Vladimir Putinniñ rejimini, hususan ükümetten tış ve aq qorçalayıcı cemaat teşkilâtlarınıñ faaliyetini sıñırlağan ya da yasaqlağan Rusiye qanunlarını tenqit etken edi.
2017 senesi, Alekseyeva 90 yaşını toldurğanda, Putin şahsen evine kelip, onı hayırlağan edi. Soñra da aq qorçalayıcı faaliyetinde büyük ğalebeler içün devlet mukâfatınen taqdirledi.
