Rusiye apishanelerinde bulunğan jurnalistlerniñ yarısından çoq işğal etilgen Qırımda tutuldı, dep aytıla New York merkezli Jurnalistlerni qoruv komitetiniñ (JQK) 2019 senesiniñ esabatında, dep haber ete Azatlıq Radiosı.
«Rusiye yedi jurnalistni apiste tuttı, dördü işğal etilgen Qırımda çalışıp, qırımtatar azlığınıñ vaziyetini ve Rusiyeniñ ücümlarını qayd etken edi», – dep aytıla haberde.
JQK, bütün kütleviy haber vastalarında, hususan internette, haberlerni aydınlatqan ya da cemaat işlerini izaatlağan insanlarnı jurnalist dep saya. Şu sebepten cedvelde qırımlı bloger Nariman Memedeminov da bar, o, Azatlıq Radiosınıñ Qırım.Aqiqat leyhasına da malümat bergen edi.
Aynı vaqıtta bu cedvelde Donetskte Rusiye tarafdarı aydutlar tarafından tutulğan Azatlıq Radiosınıñ müellifi Stanislav Aseyev yoq. Esabatta tek devlet akimiyetiniñ apishanelerinde bulunğan jurnalistler aqqında aytıla. Devletten tış subyektlerniñ esirligine tüşken ya da ğayıp olğanlar aqqında laf ketmey.
Umumen alğanda, JQK ilk malümatına köre, dünya devletleri 2019 senesi dekabrniñ 1-nde 250 jurnalistni apiste tuta. 2018 senesi tasdıqlanğan malümatqa köre aman-aman aynı raqam edi (o vaqıt mütehassıslar apiske alınğan 255 jurnalistni sayğan edi). JQK, qoşma malümat raqamnı deñiştire bile, dep qayd ete.
Türkiyede 47 jurnalist apiste qala (bıltır olarnıñ sayısı 68 olğan edi), amma ekspertler vaziyet eyileşkenini tüşünmey, çünki taqip etilgenlerniñ bir qısmı alâ daa mahkeme altında ya da istinaf esnasında buluna ve ileride apiske alınması mümkün.
48 jurnalist Qıtayda, eñ azından 26 jurnalist Saudiy Arabistanda apiste buluna, Mısırda da apiste yatqan jurnalistlerniñ sayısı aynı. Soñra bu cedvelde Eritreya, Vyetnam ve İran keteler.
JQK, apiske alınğan jurnalistlerniñ eñ büyük sayısını 2016 senesi qayd etken edi – o vaqıt umumen dünyada olarnıñ sayısı 273 edi.
