Rusiyede mahküm etilgen Stanislav Klıh açlıq ilân etti, dep bildirdi rusiyeli aq qorçalayıcı Tatyana Şçur Klıhnıñ anası bergen malümatqa esaslanıp.
«Bugün Stanislav Klıhnıñ anası telefon etip, oğlu açlıq ilân etkenini haber etti. Bunı oña telefonda bildirdi. Daa ziyade dayanmağa mümkün degil: kamerada suvuq, aşlar yaramay, qusacağıñ kele, ve eñ esası unutıluv! Deñişmelerni beklevnen bağlı ümüt yañı ümütsizliknen bite bile. Stasnıñ açlığı – çağıruv, yalvaruv, yañı prezidentke Verhneuralsk apishanesiniñ qırmızı tola divarlarından, yañğızlıq ve qaranlıqtan yardım istegi», – dep aytıla Şçurnıñ Facebook saifesinde.
Diger menbalar bu malümatnı şimdilik tasdıqlamay. Qırım.Aqiqat tafsilâtlı malümat almaq içün Tamara Klıhnen bağlanmağa tırışa.
Ukraina vatandaşı Stanislav Klıh Rusiyede 2014 senesi 1994-1995 seneleri qışta birinci çeçen cenkinde Rusiye quvetlerine qarşı cenk areketlerinde iştirak etüv ve Rusiye askerlerini öldürüv qabaatı boyunca tutuldı. Bu dava boyunca daa bir ukrainalı – Nikolay Karpük – qabaatlana.
Klıh qabaatını inkâr ete, qorantası ve dostları mahküm etilgen kişi Çeçenistanda iç bir vaqıt olmadı, dep israr eteler.
2016 senesi mayısnıñ 26-nda Rusiyeniñ Çeçenistan vilâyetindeki mahkeme Klıhnı 20 yılğa üküm etti; 2016 senesi oktâbr ayında Rusiye Yuqarı mahkemesi imayesiniñ temyiz arizasını red etti.
Klıh Rusiye quvetçileri tarafından qanunsız şekilde tutulğanını, malümat ve şaatlıq ise işkence neticesinde berildi, dep bildire. Advokatlar ve aq qorçalayıcılar Stanislav Klıhnıñ sağlıq problemleri, hususan maneviy alı aqqında çoq aytqan ediler.
Rusiyedeki «Memorial» aq qorçalayıcı merkezi Klıhnı siyasiy mabüs dep tanıdı. Amnesty International halqara aq qorçalayıcı teşkilâtı Klıh «adalet parodiyasınıñ» qurbanı oldı, dep bildirdi.
