Rusiyede mahkemesi tarafından 15 yıl apis cezasına mahküm etilgen kezlevli ressam Bogdan Zizanıñ açılq aktsiyasından soñ midesi ağırıp başlağan. Bunı Qırım.Aqiqatqa tatası Aleksandara Barkova haber etti.
"Mende olğan soñki malümat şöyledir, uzun zamandır aşamağanı içün şimdi üzviyeti aşnı qabul etmey. Yazıq ki, amma tafsilâtnı bilmeyim, şimdi kimse bir şey bilmey, Bogdan er kesten ayırılğan", - dep qayd etti Barkova.
Rusiyede ekimlerniñ sağlıq problemleri sebebinden Zizağa tibbiy yardım kösterelermi yoqmı kibi sualge şöyle cevap berdi:
"Anda ekimler siyrek bir şey yapalar. Şunıñ içün yoq dey bilemiz. Bir şey aytmaq pek qıyın. İrına Danılovıç ve diger siyasiy mabüslerni ne alğa ketirgenlerini köremiz. Buña da köre oña tibbiy yardım kösterilgeninde pek şübelenem".
İyünniñ 10-nda siyasiy mabüsniñ tatası Qırım.Aqiqatqa Bogdan Zizanıñ açlıq ilân etkenini bildirgen edi. 17 künden soñ Ziza açlıqnı toqtattı. Açlıq aktsiyanıñ 17 künü içinde o 10 kilo azdı ve daa sert nezaret altında ayrı kamerağa avuştırıldı.
İyünniñ 6-nda Rusiye mahkemesi kezlevli ressam Bogdan Zizanı tuvğan şeerinde keçirgen cenkke qarşı aktsiyası içün 15 yıl apis cezasına mahküm etti.
2022 senesi mayıs ayında Kezlevli Bogdan Ziza Kezlev memuriyetiniñ binasınıñ fasadında mavı ve sarı boya ve yanıcı qarışmanıñ izleri aşkâr etilgen zaman Rusiye quvetçileri tarafından yaqalandı. Ertesi künü Qırım televizionı kezlevliniñ qırımlılar ögünde "tövbesini" kösterdi. Bu kibi videolar Rusiyeniñ Ukrayinağa qarşı büyük istilâsı başlanğandan berli Rusiye tarafdarı telegram kanalları ve haber vastalarında cenkke qarşı narazılıqlarğa açıq takbih kibi sıq-sıq rastkelinir. Bogdan Zizanıñ yaqınları onıñ üzerinde bedeniy küç qullanğanına dair alemetlerni körip, onıñ iskencege ögratılması ihtimalınıñ olğanını bildirdiler. Tutulğan soñ Bogdan Zizanı başta "Rusiye silâlı quvetlerini itibardan tüşürgeni" içün para cezasına mahküm ettiler, soñra tevqif ettiler. O vaqıttan berli o SİZO-da buluna. Bogdan Rusiye Ceza qanunnamesiniñ üç maddesine binaen qabaatlana. Qabaatlavlar arasında terrorcılıq da bar, bunıñ içün o 15 yıl apis cezasına mahküm etile bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
