Rusiyede apis cezasına mahküm etilgen qırımtatar faali Vladlen Abdulkadırovnıñ arqası keskin şekilde ağırıp başlağan. Bunı "Qırım birdemligi" cemaat birleşmesi haber ete.
Siyasiy mabüsniñ ömür arqadaşı Gülzarnıñ uquq qoruyıcılarğa aytıp bergeni kibi, ağrı Noveçerkassktan RF-nıñ Lipetsk vilâyetiniñ 2-nci sanlı Yelts apishanesine etap etilgen soñ keskinleşken. O, bu omurğaara quyuldıqnıñ alâmetleridir, dep saya.
"Daa Novoçerkaskta bulunır eken arqası ağırıp başaldı, etap vaqtında qırmaçağa bağlı qollarda şeylerini taşımaq kerek olğan soñ ise ağrı keskinleşti. Apishanede resim çektiler ve cerrahqa yolladılar. O da nevrologğa yolladı, amma ekimniñ mesleatı daa olmadı", - dep yazıla bildirmede.
"Qırım birdemligi"niñ haber etkeni kibi, Abdulkadırov dört adamlıq kiçik kamerada tutula, ara-sıra dini yasaq etken aştan red ete.
"Menim aqayım sabr ete, dayana. Bu vaqıt devamında bir kere bile bundan aytınmadı. O Allahnıñ sınavından lâyıq şekilde keçe ve böyle etip maña ve bizim balalarımızğa güzel örnek köstere", - dep qayd etti o.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Rostov-na-Dogu Cenübiy okrugınıñ arbiy mahkemesi Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovğa qarşı qabaatlayıcı qarar çıqardı. Olarnı 12 yıldan 14 yılğa qadar ilk 5 yılını apishanede keçirmek şartınen sert rejimli koloniyada qalmalarına üküm ettiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
