Russiye tarafından 11 yıl apis cezasına mahküm etilgen qırımlı İvan Yatskin tromboflebit olmasına baqmadan tibbiy yardımdan marum etilgen. Bunı Ukrayina Yuqarı Radasınıñ insan aqları vekâletlisi Dmıtro Lubinets bildirdi.
Onıñ sözlerine köre, Yatskin cezahane ekimleri tarafından baqılmağan, tuvğanları ise müessise hadimleri izin bermegenleri içün oña ilâclar alıp bere bilemeyler. Apayı Gülnaranıñ sözlerine köre, esas tibbiy malzemelerniñ olmaması sebebinden oña red ete ekenler.
"Siyasiy mabüsniñ ayağında tromboflebit ve buña eşlik etken trofik ülserler bar. Kameralarda mabüsler bütün kün ayaqta keçireler. Yatskin içün bu kerçek iskencedir", - dep bildirdi ombudsman.
Lubinetsnıñ bildirgeni kibi, apis etilgen soñ qırımlınıñ körme qabiliyeti zayıflaştı, tişleri bozuldı ve daimiy baş ağırları peyda oldı.
"Dünya toplulığını apis etilgen Ukrayina vatandşlarınıñ azat etilmesini talap etip, Rusige tazyıqnı quvetleştirmege çağıram", - dep qoştı o.
2021 senesi mayısnıñ 21-nde Rusiye nezaretinde olğan Qırımnıñ Yuqarı mahkemesi «devlet hainliginen» qabaatlanğan Qırım sakini İvan Yatskinge üküm çıqardı. Alla Hineviçniñ reisliginde qadılar kollegiyası İvan Yatskinni bir yıl sıñırlav ile 11 yıl sert apis cezasına mahküm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
